Erdahin Alu Payo - Ersembah Arah Pendahin ( Bahan PA Mamre 22 - 28 Maret )

Bahan Bimbingen PA Mamre 22 - 28 Maret 2020

Erdahin Alu Payo

Ogen : Kuan-kuanen 10: 22;

22. Erkiteken pasu-pasu Dibata nge maka kalak jadi bayak,
erdahin erbintuas labo nambahi kebayaken.

Epesus 4: 25-32
25. Olanai erbual! Kerina arus nuriken si tuhu-tuhu man seninana, sabap kerina kita ringring i bas sada kula.
26. Adi merawa kam, ola seh erdosa. Janah ola simpan rawandu seh ben wari.
27. Ola bere kesempaten man si Iblis.
28. Kalak si nangko gelgel nari, olanai ia nangko. Erdahinlah ia alu mehuli guna ncariken keperlunna, janah gelah lit i bas ia guna nampati kalak si i bas kepiceten.
29. Adi kam ngerana ola sitik pe belasken cakap si la erturi-turin. Tapi kata-kata si ergunalah belasken, si banci nampati kalak si deban rikutken perluna, gelah kata-katandu e maba kiniulin man si megisa.
30. Ola ceda ate Kesah Dibata ibahanndu, sabap Kesah e kap capna maka kam sikerajangen Dibata. Kesah e jaminen maka reh me warina Dibata ndungi dahinNa mulahi kam.
31. Tadingken cian ate, perampus ras pernembeh. Olanai kam si isak-isaken ntah si cekurak-cekuraken. Olanai sitik pe erelem-elem.
32. Tapi melias dingen mesayanglah sapih-sapih kam. Si alem-alemenlah bagi Dibata enggo ngalemi kam i bas Kristus.

Tema : Ersembah arah Pendahin

Tujun : Gelah Mamre:

Meteh maka erdahin e me ibadah
Ngasup ndiken pendahinna alu payo

Metode : Ceramah/diskusi

KATA PENARUH
Erdahin, megati denga iertiken sebagai sada ukumen erkiteken dosa (akibat dosa manusia). Ibas kitab Kejadin 1: 26 ituriken ija ope manusia \ erdosa (ibas Dibata nepa manusia) jelas ituriken maka tujun Dibata njadiken manusia eme gelah manusia njagai, ngelestariken, ngusahai ntah pe ngelola ras memberdayaken kerina tinepaNa. Alu bage erdahin eme sada kepercayan siibereken Dibata man manusia. Manusia jadi mandataris Dibata. jadi erdahin sada 'pemere' ntah pe 'karunia', 'anugrah' Dibata man manusia. Erkiteken 'erdahin' e sada karunia/pemere Dibata, maka erdahin/dahin e mulia, erdahin e sada tanggung jawab si bereken Dibata; erdahin e eme ibadah/ersembah man Tuhan.

URAIAN
Ibas kitab Kuan-kuanen 10: 22 ngataken maka "erkiteken pasu-pasu Dibata nge maka kita bayak". Seterusna ikataken: "erdahin erbintuas labo nambahi kebayaken". Megati ayat enda jadi ayat pembenaren ibas ermalas-malas. Jelas maksud ayat enda labo bage! Ayat enda negasken maka bicara pe manusia erbintuas erdahin, adi la ipasu-pasu Dibata la lit ertina erbintuas. Memang perlu erbintuas/kerja keras erdahin, tapi pemasu-masun Dibata e nge si jadi pematang. Kata `bayak' ijenda la saja ibas pengertin materi/erta, tapi termasuk kemalemen ate ras dame, eme erti kebayaken ibas Dibata nari.

Lit kalak bayak secara materi/erta si la banci menikmati kebayakenna; mbue masalah sinderpa, pinakit, jabu la siangkan, rstna. Ibas kita erdahin perlu si gejap maka lit baginta, lit ka bagin Dibata. Baginta eme erdahin alu tutus ras erpengarapen nandangi pasu-pasuNa. Bagin Dibata eme masu-masu pendahinta e. Epesus 4: 25 - 32 eme sada penegasen maka kita si enggo ngaloken Jesus ibas geluhta enggo terjadi transformasi (perubahen manusia si male jadi manusia simbaru). Biak manusia si ndekah e enggo sitangtangi jenari makeken biak/karakter manusia simbaru. Emaka karakterta selaku manusia simbaru arus ncidahken biak-biak Kristus. Enda sada perjuangen siterus-menerus alu penampat Kesah si Badia. Selaku manusia simbaru maka karakterta, motivasinta ibas erdahin pe arus tertuju kempak Kristus, sebab kita eme "imago Dei" (segambar ras Dibata)

APLIKASI
Selaku Mamre si enggo ipelimbarui jadi manusia simbaru ras enggo nadingken biak-biak manusia sindekah arus sigejap maka kai pe pendahin/profesinta e kerina jadi sada penembahen/ibadah man Tuhan. Erkiteken si e kita pe mpertanggung jawabken kerina pendahinta man Tuhan. Erkiteken dahin e sada karunia/pemere Dibata maka ibas pendahinta kita pe setia man simereken pendahin e. Patut pe si gejap maka pasu-pasu si ibereken Dibata man banta e ate Dibata gelah kita banci jadi pasu-pasu ka man kaiak siperlu isampati (jadi saluran berkat). Emaka sidahikenlah dahinta alu dem tanggung jawab!

DISKUSI