Ersadalah Ukurndu - Musyawarah Warga Sidi Runggun ( Bahan PJJ 1 - 7 Maret )


Bahan Bimbingen Perpulungen Jabu-Jabu 1 - 7 Maret 2020
Ersadalah Ukurndu
Musyawarah Warga Sidi Runggun

Ogen : Roma 15:5-6
5. Mbera-mbera Dibata ulu kesabaren ate dingen ulu pergegeh erbahanca ersada ukurndu kerina erkiteken Jesus Kristus jadi usihenndu.
6. Gelah kerina kam, alu ersada sora banci muji Dibata, Bapa Tuhanta Jesus Kristus.

Nggeluh ersada ukur (hidup rukun) jadi perayaken kerina jelma; ersada ukur i bas jabu, ersada ukur ersenina erturang, ersada ukur i bas pendahin khususna pe ersada ukur i bas Gereja si kin jadi usihen man doni enda. Nggeluh ersada ukur tuhu mehuli ras jadi pujin i bas doni enda (bdk. Msm. 133). Melala dahin, tanggung jawab si mberat, jadi reh nahangna adi ersada ukur kerina ndahikenca. Sebalikna ka pe dahin si arusna menukah banci jadi mesera ndungisa adi la lit ije kiniersadan ukur. Tapi si jadi perenungen, engkai maka megati denga sijumpai perubaten, la siangkan i bas perpulungen? Musuh kiniersadan ukur eme kiniganjangen ukur ras kurang kesabarennta nangdangi kalak si deban.

Paulus mpegegehi kerina perpulungen sipemena gelah tetap ersada ukur amin pe lit perbedan ras lit kiniseran, i gasgasi erkiteken kiniteken man Tuhan Jesus. Gereja selaku kula Kristus pelain-lain i bas latar belakang ia ipebelin-belin, lain pemeteh-tingkat pendidiken, pelain-lain usia ras biak. Si e kerina mpengaruhi caranta rukur. I bas perpulungen Roma pe lit nge perbedan, guna si e Paulus ngelayasi perpulungen uga njagai hubungen sapi-sapih ngawan ni perpulungen, aminna pe lit perbedan perpulungen asal Jahudi ras sila Jahudi. Perpulungen si asalna Jahudi megati denga terbaba-baba kerna aturen agamana ndube (aturen pangan, sabat, wari-wari ras si debanna), dingen kalak si la Jahudi singgeluh rikutken kebebasen sienggo ibereken Kristus. Menuntut kalak si deban bagi perukurenta mpeturah sigel ukur, gelah tetap terjaga kiniersadan, Paulus ngajarken gelah simegegeh kinitekenna arus nampati kalak simerampek kinitekenna. Perbedan labo banci ipersilahang entah ibeneken, sabab sipelain-lain e kap pemere Tuhan ku bas perpulungen. Siperlu ilakoken ngubah cara pandang kerna perbedan e. Banci jadi lit perbedan pendapat, langa seri pengidahta ras pengangkanta kerna sada hal siperlu itengeti ula seh rubat, ula encedai pusuh temanta seh encedai kiniersadan bas perpulungen. Sijadiken perbedan e jadi kebayaken perpulungen.

Orat geluh Gereja eme ersada; ersada ukur, seri tujunta dingen hubungen sisempabu sapih-sapih perpulungen. Perpulungen si ersada ukur nge singasup muji Tuhan. Aminna pe mejile gedung Gerejana, sikap kerina peralaten i bas Gereja e dingen mbelin perputaren keuangenna tapi adi labo lit kiniersadan labo ernanam. Perpulungen sierbelah-belah/la siangkan labo ia merhat ras-ras kundul pe, rende muji Tuhan pe labo ia tenang seh ka deba sekali erminggu pe la ia nggit emaka labo banci ersada sorana muji Tuhan. Gelah banci Gereja ersada, usih lah Kristus, perukurenta ras pusuhta bagi perukuren Kristus. Amin pe kita pelain-lain, la sempurna i lebe-lebeNa tapi kepate IA, saber IA nangdangi kita, ialokenNa kita bagi litna. Gereja terus erdalan ku bas kesempurnan, pembaharuan ras perubahen tetap nge lit, tapi kiniersadan ukur la banci urak.

I bas Tata Laksana Tata Gereja Gerejanta BAB XXXIX Pasal 164 enggo iaturken kerna Musyawarah Warga Sidi Runggun:
1. Musyawarah Warga Sidi Runggun adalah sarana bagi warga dan Majelis Runggun untuk saling memberi masukan mengenai perkembangan kehidupan bergereja di Runggun dalam bersekutu, bersaksi dan melayani.
2. Musyawarah Warga Sidi Runggun bukan merupakan sarana pengambilan keputusan.
3. Musyawarah Warga Sidi Runggun dilaksanakan 1 kali dalam setiap tahun selambat-lambatnya bulan Maret dan dipimpin oleh Majelis Runggun.
4. Musyawarah Warga Sidi Runggun dilaksanakan untuk mendengar laporan perkembangan jemaat dari BPMR beserta seksi-seksinya, pengurus unit pelayanan, dan pengurus PJJ serta pengajuan usul-usul tentang kehidupan bersekutu, bersaksi dan melayani serta pembinaan guna pertumbuhan jemaat. 5. Usul/masukan tentang kehidupan bersekutu, bersaksi, melayani dan pembinaan harus ditampung dan ditanggapi oleh Majelis Runggun dalam keputusan pada Sidang Majelis Runggun yang terdekat.

Arah musyawarah e mabai kita gelah sada pengidahta kerna dahin persekutuan, kesaksian ras pelayanen Gereja, mpersada perukurenta uga gelah dahin e banci idahiken, mpersada arihta i bas ngurupi dahin e ras mpersada gegehta guna ncukupi perbeliten gerejanta. Jadi i bas kita mbegiken laporen Majelis Runggun siperdiateken lah kerina bidang enda. La terjeng keuangen entah diakonia saja si megetget si siksiki tapi kerina si siksiki, Koinonia (dahin kategorial), Marturia ras Diakonia. Mungkin lit ka nge si idah dinamika si la mehuli (negatif) i bas pelaksanan Musyawarah e. Lit anggapen maka Musyawarah Warga Sidi Runggun eme pertanggungjawaben kinerja Majelis Runggun, emaka pepuasken kel ia ngerana ras mandangi pendahin Majelis Runggun, erkiteken lit denga perpulungen erpengakap maka enda ingan/wadah mandangi dahin Runggun Gereja. Pengakap si bagenda perlu sibeneken gelah musyawarah ngawan erdalin alu mehuli. Ngawan perpulungen ras majelis runggun arus tetap ersada guna mpekena-kena perpulungen Tuhan.

EVALUASI :
Lit nge kita ngerenungken kiniseran Jesus sada minggu enda?

DISKUSI :
  1. Turiken pengangkanndu kerna ogenta: Ersada ukurndu kerina, gelah alu ersada sora banci muji Tuhan. 
  2. Evaluasi perdalinen musyawarah ngawan runggun (i bas waktu pelaksanan dinamika perdalinenna ras pe i bas Majelis Runggun ndalanken usul-usul i bas perpulungen nari). Si apai denga akapndu sipekena ras uga mpekenasa.
AKSI :
Bahanlah usulta ku Musyawarah Warga Sidi Runggun guna kiniulin perdalinen pelayanen Runggunta.

USULAN ENDE-ENDEN
  1. KEE GBKP No. 319:1-3  ( KLIK JUDUL KEE UNTUK MELIHAT LIRIK / TEKS )
  2. KEE GBKP No. 368:1-2  ( KLIK JUDUL KEE UNTUK MELIHAT LIRIK / TEKS )
  3. KEE GBKP No. 421:1-3  ( KLIK JUDUL KEE UNTUK MELIHAT LIRIK / TEKS )
  4. KEE GBKP No. 214:1-2  ( KLIK JUDUL KEE UNTUK MELIHAT LIRIK / TEKS )
TOPIK PERTOTON SYAFAAT
  1. Pelaksanan Musyawarah Warga Sidi Runggun erdaldn alu mehuli.
  2. Pelayan GBKP gelah reh ulina.
  3. Serayan Tuhan si sangana lit bas perbeben gelah megegeh.
Pdt. Sariyani Barus, M.Th.


Belum ada Komentar untuk "Ersadalah Ukurndu - Musyawarah Warga Sidi Runggun ( Bahan PJJ 1 - 7 Maret )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel