Geluhku E Me Ibadah Ras Persembahenku Man Dibata - Konfesi GBP Kerna Ibadah ( Bahan PA Moria 15 - 21 Maret )

Bahan Bimbingen PA Moria 15-21 Maret 2020

Konfesi GBKP Kerna Ibadah

SI MAN OGEN : Roma 12:1-2

Lagu langkah kalak Kristen
1. O senina-seninangku, nginget perkuah ate Dibata si mbelin si isehkenNa man banta, kupindo man bandu: Endeskenlah kulandu man Dibata saja selaku persembahen si nggeluh rikutken si ngena ateNa. Sabap bage me arusna kam ersembah man Dibata sue ras biakndu selaku mahluk si rukur.
2. Ola pelepas dirindu jadi seri ras doni enda, tapi berelah maka perukurenndu ipelimbarui Dibata. Alu bage banci idatndu kai sura-sura Dibata, kai si mehuli, kai si ngena ateNa, janah kai si sempurna.

T E M A : GELUHKU E ME IBADAH RAS PERSEMBAHENKU MAN DIBATA

T U J U N : Gelah Moria:

Meteh maka kegeluhen erpengendes man Dibata eme persembahen si tuhu tuhu.
Nembah man Dibata arah kerina bentuk perukuren, pengerana ras pendahin si tep tep wari.

METODE PA : Sharing Pengalamen

Kata Penaruh.
I bas negaranta enda, cukup luar biasa pertambahen jumlah Gereja, subuk jumlah gelarna bage pe jumlah gedungna. Selain pertambahen jenis Gereja, ingan ras jenis kebaktin pe beragam kal cibalna; lit i bas Mall, i bas Hotel, i gelanggang olah raga, i bas taman, i tepi pantai, rsd. Bahkan tergejab maka melala gereja erlumba mpromosiken keuniken gedung ras nuansa ibadahna masing-masing. Lit deba erbahan gelar ibadah Kebaktian Kebangunan Rohani (KKR), Kebaktian Kebangkitan Iman (KKI), Kebaktian Penyegaran Iman (KPI), Pekabaran Injil (PI) ibadah doa massal, ras sidebanna. Adi si pergermetken, maka pertambahen Gereja, lokasi ras jenis-jenis ibadah enda, bagi si kurang sendalanen ras dampak kegeluhen kalak Kristen i tengah masyarakat.

Labo padah i bas negaranta, banci jadi kecibal si bage pe jadi i bas Gerejanta. Labo padah i bas Gerejanta, banci jadi dampak peribadahen enda pe kurang teridah ibas keluarganta. Labo padah ibas keluarganta, banci jadi peribadahenta pe kurang berdampak man dirinta jine. Gereja ras jelma si rajin beribadah tapi la maba kiniulin man jelma si enterem, tentu e peribadahen si sia-sia. Enda banci jadi peturah kemamangen ras kebiaren man agama si deban, sabap pertambahen jumlah la sendalanen ras nanamna i bas masyarakat. Kai ndia sababna? I ja ndia salah benangna? Uga ndia pekenasa? Penungkunen penungkunen enda me dalanta jumpa i bas PA Moria sekali enda.

Mpebagesi Pengangkan Kerna Ogen.
Kai kin situhuna pengertin ersembah (beribadah) man Dibata? Kata ibadah rehna i bas cakab Heber nari, eme kata "Abad", Kata kata enda erkembang jadi kata Abodah = Ibadah, Abdi, Obed, Abdiel, ras sidebanna. Erti kata "Abad" eme Biak Dibata ( sifat ) si mereken diri, melayankan diri, mengabdiken diri, berkorban guna kiniulin manusia ras kerina isi doni enda. Pustaka Si Badia pe nuriken maka kerina suruh-suruhen Dibata igelari "Ebed Jahwe", eme jelmas si idilo Dibata mereken dirina nggeluh ibas biak Dibata, nggeluh maba biak DIbata i bas dirina, eme kegeluhen si maba kiniulin man jelma si nterem.

Si jadi cataten penting eme: biak Dibata enda labo saja berlaku i bas jam kebaktin minggu, i ruang Gereja entah pe perayan gerejani. Tapi Abad/Ibadah eme biak Jesus si iperagakenNA i bas kerina paksa ras ingan. Labo wari minggu ngenca Jesus mehuli, tapi tep-tep wari. Labo wari minggu ngenca Jesus mperdiateken kegeluhenta, Enda me sabapna maka Dibata merawa man bangsa Israel erkiteken wari minggu ia bujur, tapi wari sideban la bujur.

Rikutken penjelasen enda, maka beribadah ras ersembah labo sekedar ku Gereja i bas wari minggu, tapi ibadah eme biak nggeluh kalak si erkiniteken, si ngelayanken dirina tep-tep wari (Senin-Minggu) sedekah 24 jam, subuk i rumah, i juma, i tiga, i kantor, i japa pe. Erkiteken si e, Paulus mpersingeti perpulungen Roma, nina: "Endeskenlah geluhndu man Dibata saja selaku persembahen si nggeluh", sabap kegeluhen si maba kiniulin man kalak si deban eme ibadah ras persembahen sejati.

Ibadah si payo turah arah dua cara si perlu ibiasaken i bas geluhta:

Sipemena: mbiasaken diri ersembah man Dibata i bas kebaktin minggu, i je ipersingeti ulihi gelah tetap nggeluh i bas biak ras perukuren Kristus. Arah dampar pengajaren kiniteken, ibadah eme ingan kalak si tek ngisi ulang diri alu perukuren ras kepentaren, ingan erlajar menata ulang kegeluhenta erkelang-kelangken thema-thema kalender Gerejawi (spiritual curiculum), gelah reh sikapna ncibalken diri i bas geluh bage pe ku sekelewetna.
Sipeduaken; ibadah si tuhu-tuhu eme setia nggeluhken biak Dibata, dingen setia mperagakensa ibas kegeluhen tep-tep wari. Biak geluh si sedekah enda ertima nandangi kiniulin kalak, terlatih jadi kegeluhen si leben maba kiniulin. Gelah biak si sedekah enda ngukurken diri jine erjuang leben maba kiniulin man kalak sideban.

Pengkenaina.
Kemungkinen, persoalen Gereja-Gereja gundari eme salah pengertin kerna ibadah bage pe ersembah man Dibata. Padahal i bas Pusataka Si Badia eggo ndube isingetken , maka kiniulin nggeluh manusia mbelin ipengaruhi pengertinna kerna ibadah i bas wari sabat ras ibadah si tep-tep wari. Pengertin si lepak me erbahansa kurang kal dampak kehadiren kalak kristen i bas doni enda, termasuk i bas negara ras kutanta. Penjelasen enda ningetken man banta maka ibadah la banci sekedar rutinitas
perpulungen GBKP i bas wari minggu ras i bas gedung Gereja saja, tapi arus jadi biak nggeluh perpulungen GBKP i bas kerina situasi, i bas kerina ruang ras waktu. GBKP ngaku maka Jesus eme takal Gereja. Emaka perpulungen GBKP selaku kula ni Kristus arus nggeluh bagi biak Kristus.
Ibadah si la iperagaken i bas kegeluhen si tep-tep wari eme kesalahan si
mbelin i bas erkiniteken.

Labo ngena ate Dibata kalak si muji Dibata tapi terudu ka ia ipujiken kalak sideban. Labo ngena ate Dibata kalak si ersembah man Dibata tapi nggerak ka akapna isembah kalak si deban. Labo ngena ate Dibata, bujur kita i Gereja, tapi la kita bujur man temanta. Tapi ngena ate Dibata, kalak
si muji Dibata janah meriah ka akapna erbahan temanna medolat. Erkiteken si e, perlu kal kita mengermet nandangi pengajaren gerejanta bage pe pengertin pribadinta kerna erti ibadah, kususna pengajaren nandangi anak-anakta, bahan katekisasi, tata gereja ras kegeluhen
perbadahen si iperagaken keluarga-keluarga perpulungen GBKP.

Diskusi:
1. Cuba sidiskusiken kai ndia sabapna:

Di kune lit jelma mejingkat kal ku Gereja, tapi kejingkatenna la sendalanen ras pengkebet geluhna si tep-tep wari.
Lit ka jelma, teridah mehuli kal ia i bas kegeluhen si tep tep wari, tapi la ka diatena ku Gereja.

2. Kai ndia pengertin anak kempunta kerna ibadah, di kune itatapna cara geluhta si tep-tep wari?
3. Kai ndia banci sibahan, gelah anak kempunta terbiasa i bas kegeluhen
si beribadah setiap wari (nggeluh i bas biak Dibata), jadi generasi si
maba kiniulin man kerina manusia?

Pdt. Krismas Imanta Barus,MTh.