Musyawarah Sidi - Metunggung Dingen Ratur ( Bahan PA Permata 1 - 7 Maret )

Bahan Bimbingen PA Permata 1 - 7 Maret 2020

Musyawarah Sidi

Nas : 1 Korinti 14:26-40

Kiniraturen i bas perpulungen
26. Kuga dage arusna o senina-senina? Adi pulung kam, sekalak-sekalak kam ngendeken ende-enden si lit i bas ia, sekalak-sekalak nehken ajarna, sekalak-sekalak nehken perkara si ipetangkas Dibata, sekalak-sekalak nehken berita i bas cakap Kesah, janah sekalak-sekalak nuriken antusen cakap Kesah e. Bahanlah si e kerina guna majekken perpulungen.
27. Adi lit kalak si atena ngerana i bas cakap Kesah, cukup me dua ntah telu kalak saja, janah sekalak-sekalak ia ngerana, bage pe lit min kalak si nuriken antusen kata e.
28. Tapi adi la lit kalak si nuriken antusen cakap Kesah e, madin me sinik saja i bas perpulungen. Man dirina jine ras man Dibata saja lah ia ngerana.
29. Adi nabi, dua ntah telu kalak ia si ngerana, janah kalak si deban ertimbang kerna kai si ikatakenna e.
30. Tapi adi man kalak si sangana kundul megi-megi lit perkara si ipetangkas Dibata, kalak si leben ngerana ndai arus sinik.
31. Kerina nabi banci ernubuat alu ergiliren, gelah kerina ndatken pengajaren dingen kerina ipegegehi.
32. Penjemba Kesah guna ernubuat lit kap i teruh kuasa nabi.
33. Sabap Dibata labo Dibata kinilaraturen, tapi Dibata kiniraturen.
Bali ras i bas kerina perpulungen-perpulungen si enggo ikhususken jadi sikerajangen Dibata.
34. Si diberu arus sinik i bas perpulungen. La ia ipelepas ngerana. La ia banci jadi peminpin, sue ras si ikataken Undang-undang.
35. Adi perlu iakapna ia meteh sada-sada perkara, i rumah lah ia nungkun man perbulangenna. Man kemelan kap adi diberu nungkun i bas perpulungen.
36. Banci kin i bas kam nari rehna Kata Dibata? Ntah man bandu saja kin Kata Dibata e ipeseh?
37. Adi lit kalak si erpengakap maka ia nabi, ntah erpengakap maka i bas ia lit pemere Kesah, arus ietehna maka si kusuratken man bandu enda e me kap perentah Tuhan.
38. Janah adi lit kalak si la mperdiateken si enda, ia pe ola perdiateken.
39. E maka o senina-senina, ersura-suralah kam guna ernubuat, janah ola olangi kalak si ngerana i bas cakap Kesah.
40. Lakokenlah kerina alu metunggung dingen ratur.

Tema : Metunggung Dingen Ratur

Gelah Permata GBKP :

Meteh pentingna Musyawarah Ngawan
Ikut muat bagin i bas perdalanen gereja.

Metode : Aksi Permata GBKP

I. BENA KATA.
Musyawarah Ngawan GBKP iatur i bas Tata Gereja GBKP 2015-2025, III Tata Laksana, H Organisasi, Bab XXXIX Pasal 164. Musyawarah Ngawan e me sarana man Warga GBKP (ngawan ni perpulungen-termasuk sekalak anggota PERMATA GBKP) guna ikut muat bagin ngukuri dahin-dahin pelayanen guna majekken perpulungen ( 1 Kor 14 : 26), majekken Kula Kristus (1 Kor 14:27-28). Ibas Musyawarah Ngawan radu ras kerina (termasuk sekalak PERMATA selaku anggota ngawan ni perpulungen) encakapken (mengevaluasi) dahin-dahin tritugas gereja: Koinonia (Persekutuan), Marturia (Kesaksian) ras Diakonia (Pelayanan). Bage ka pe nehken usul/masuken guna idalanken jadi program pelayanen Runggun. Guna si e Majelis Runggun ras Persekutuan Kategorial (termasuk PERMATA Runggun) arus mereken Laporen, nikapken Rancangan Program ras Anggarenna. Gelah dahin tritugas gereja ilakoken alu "metunggung dingen ratur" (Thema PA enda), erlajar kita arah nats PA enda : 1 Kor 14:26-40).

ISI
1. 1Kor 14:26-40 lit i bas bagin nats si nggedang mulai i bas 1 Kor 12:1-14:40, si ngerana kerna "pemere-pemere Kesah/karunia-karunia Roh". Janah i has bagin nats si lebih gendek, 1 Kor 14:26-40 lit i bas 1 Kor 14:1-40, si ngerana tole kerna pemere-pemere Kesah si Badia. Perikop 1 Kor 14:26-40 ngerana kerna erbage-bage aktifitas ngawan ni Perpulungen Korinti i bas Kebaktin/Ibadah Jemaat. Ibas awalna kerina ngawan ni perpulungen ersura-sura muat bagin (beraktifitas) i bas "kebaktian" secara spontanitas, sue ras "pemere-pemere Kesah si Badia" si ialokenna (bd 1 Kor 12:1-31). Aktifitas enda e me sekalak-sekalak lit si rende, si nehken ajarna, si nehken perkara si ipetangkas Dibata, si nehken berita i bas cakap Kesah, ras si nuriken antusen cakap Kesah (ay 26). Nina Rasul Paulus, kerina aktifitas enda arus iatur pembagin waktuna, ras kerina aktifitas lit persyaratenna, e me "metunggung dingen ratur". Jadi labo ilakoken bage-bage saja (spontanitas) tanpa iuji "metunggung ras ratur" ntah "lang". Alat ujina e me Pustaka si Badia, seh maka teridah "ulu/sumber" aktifitas e tuhu i bas Dibata nari, labo i bas si "iblis" nari (bd U1 18:22; 1 Kor 12:10; 1 Tes 5:21; 1 Yoh 4:1).

2. Dibata kap ulu/sumber pemere-pernere Kesah. E maka la mungkin lit kinilaturen i bas kebaktin, i bas dahin perpulungen. Kesah si Badia mbebasken sesekalak i bas kuasa si iblis nari, janah Kesah si Badia pe ngolangi (pengekangan diri) sesekalak gelah ula iseluki (dirasuki) kuasa si iblis nari. Jadi la mungkin lit spontanitas tanpa pengekangan diri. Litna kinilaraturen i bas kebaktin, bage pe dahin-dahin perpulungen si deban la mungkin sue ras sura-sura Kesah si Badia, ntah pe lanai metunggung ras ratur Perpulungen Korinti e me erkiteken pendahin Kesah si Badia. Sabab Dibata labo Dibata kinilaraturen, tapi Dibata kiniraturen (ay 40).

3. Kepeken i bas Perpulungen Korinti enggo turah persaingen pemaken pemere-pemere Kesah si Badia (bd 1 Kor 12:4-6), si erbahan perpulungen lanai metunggung dingen ratur. Memang lit pemere Kesah si Badia si menakjubken e me ngerana i bas cakap Kesah/berbahasa Roh (ay26), tapi si pentingna i bas pemere-pemere Kesah e me nehken kekelengen (bd 1 Kor 13:1-13). Perpulungen e me Kula ni Kristus (1 Kor 12:27), janah kerina ngawan ni perpulungen e me ring-ring Kula ni Kristus e. E maka kerina ring-ring/ngawan ni perpulungen saling membutuhken. Mungkin lit perasan i bas ngawan ni Perpulungen Korinti maka ia anggota ngawan "kelas dua", erkiteken la lit i bas ia kengasupen ngerana i bas cakap Kesah/berbahasa Roh, sebab pemere "berbahasa Roh" enda me iakap pemere si mbelinna i bas perpulungen. Pengakap si bage la payo, nina Rasul Paulus. Kerina ngawan ni perpulungen e me Kula ni Kristus, si kerina penting i bas Kula ni Kristus e (labo lit ngawan kelas sada, kelas dua , rst).

PENGKENAINA
1. Kebebasen ras spontanitas e me hak setiap kalak i bas ngukuri ras ndalanken sada-sada aktifitas, termasuk i bas dahin-dahin perpulungen (tri tugas gereja). Enda teridah kal i bas kegeluhen sekalak pemuda, termasuk PERMATA GBKP. Ibas gereja, gelah metunggung ras ratur idahiken dahin tritugas gereja e, ilitken Tata Gereja. Dahin Tritugas Gereja iprogramken Runggun Gereja si ibaba ku Musyawarah Ngawan guna ndatken masuken/usulen i bas ngawan ni perpulungen nari, jenari gelah idalanken bas setiap tahunna. Kerina ngawan ni perpulungen (termasuk PERMATA) arus ndatken peranna masing-masing sue ras pemere Kesah si Badia (talenta) si ialokenna.

2. I bas Tata Gereja GBKP Pasal 164 ayat 3, Musyawarah Ngawan ilakoken si melawena i bas bulan Maret setiap tahunna. Bahan PA PERMATA 1 Kor 14:26-40 enda jadi palas/motivasi PERMATA GBKP guna keikutsertaanna ku Musyawarah Ngawan tahun 2020 enda. PERMATA GBKP arus meteh kai pentingna Musyawarah Ngawan, sebab :
a. Selaku Kula ni Kristus, sekalak Permata arus muat bagin i bas Dahin Kristus, dahin perpulungen. i bas Tata Gereja Pasal 164 ayat 6 itetapken peserta Musyawarah Ngawan rikutken jumlah ngawan i bas Runggun Gereja, janah jumlah anggota PERMATA ikut i bas jumlah ngawan ni perpulungen e. jadi lanai kal "metunggung ras ratur" Musyawarah Ngawan e, adi PERMATA la hadir/ikut i bas Musyawarah Ngawan e.
b. Ngawan ni perpulungen si tergabung i bas Persekutuan Kategorial PERMATA GBKP (termasuk KA-KR GBKP e me GBKP Masa Depan). E maka PERMATA GBKP arus ikut ngukuri, ngerencanakan ras ndalanken Dahin Gereja (Tri Tugas Gereja) ku depan, khususna si jadi program pelayanen PERMATA Runggun. Ban pe anggaran pelayanen PERMATA Runggun. Merandal pe iusulken gelah Anggaran Pendidikan/Pembinaan man PERMATA ras KA-KR itetapken Runggun Gereja buena seh 20 (dua puluh ) persen asa jumlah anggaran Runggun, si itetapken i bas APEN-ABEL Runggun Gereja.

3. I bas Musyawarah Ngawan perlu pe iusulken gelah ilitken pembinaan-pembinaan man PERMATA :
a. Pelatihen Kepemimpinen Pemuda Gereja.
b. Pelatihan Pemimpin PA PERMATA.
c. Pelatihen Pemusik Gereja, Song Leader ras Dirigen Koor.
d. Pembinaan Budaya, Politik, Ekonomi Kreatif, Olah Raga,rsd.
e. Dialog Lintas Budaya dan Agama.
f. Penguasaan 1T dan Bahasa Asing.

IV. AKSI PERMATA GBKP
Sope Musyawaah Ngawan ilakoken Runggun Gereja, PERMATA Runggun erbahan "Musyawarah Ngawan Mini PERMATA", si ipimpin Pengurus PERMATA Runggun. Pengurus PERMATA Runggun enggo erbahan Laporan Tahun 2019 ras Program Pelayanan PERMATA Runggun rikut Anggarenna Tahun 2020 ku "Musyawarah Ngawan Mini" enda, guna mido masuken/usulen i bas anggota PERMATA Runggun nari. Hasil Musyawarah Mini enda iseheken PERMATA Runggun man BPM Runggun guna ibaba ku Musyawarah Ngawan, sinilakoken Runggun Gereja i bas tahun 2020 enda.

V. USULAN LAGU