Persembahen Eme Tanda Kehormaten - Konfesi Persembahan ( Bahan PA Moria 22 - 28 Maret )

Bahan Bimbingen PA Moria 22 - 28 Maret 2020

Konfesi Persembahan

SI MAN OGEN : Maleaki 1:6-14

Imam-imam irawai TUHAN
6. Nina TUHAN si Mada Kuasa man imam-imam, “Anak mehamat man bapana, bage pe suruh-suruhen nandangi tuanna. Aku bapandu tapi ngkai maka la kam mehamat bangKu? Aku tuanndu, ngkai maka la ipehagandu Aku? Megombang kam bangKu, tapi nungkun ka kam nindu, ‘I bas kai Kam igombangi kami?’
7. Bagenda kap kam nggombangi Aku: alu mpersembahken pangan si keliamen i bas batar-batarKu. Kenca bage nungkun kam, ‘I bas kai Kam la ipehaga kami?’ Kukataken man bandu: alu encidahken maka la akapndu meherga batar-batarKu.
8. Tupung ibabandu rubia-rubia si pentang jadi persembahen, la kin akapndu salah e? Tupung ibabandu asuh-asuhen si penakiten tah cempang jadi persembahen, la kin akapndu lepak e? Cubaken baba asuh-asuhen si bage man gubernur, akapndu kin meriah ukurna tah pe ngena atena kam?”
9. Genduari, o imam-imam, cubaken pindo perkuah ate Dibata; nggit kin akapndu Ia megiken pertotonndu nginget perbahanenndu e?
10. Nina TUHAN si Mada Kuasa, “Lit min sekalak i bas kam nari nutupken pintun Rumah Pertoton e gelah la banci kam pegara api si lang-lang i bas batar-batarKu. La sitik pe meriah ukurKu ngidah kam. La Aku nggit ngaloken persembahen si ibabandu.
11. I bas tampuk doni nari ku tampukna si deban ipehaga kalak nge Aku. I japa pe itutung kalak kumenen enghamati Aku, dingen ipersembahkenna persembahen si mehuli. Mehaga gelarKu i tengah kerina bangsa-bangsa.
12. Tapi kam megombang kal bangKu tupung ikatakenndu batar-batarKu e la lit ergana dingen ipersembahkenndu i je pangan si kam pe ciga atendu.
13. Nindu, ‘Latih kal pe ndahiken dahin enda!’ Jenari mekarus kam man bangKu. Ipersembahkenndu bangKu asuh-asuhen tinangko, tah pe cempang, tah penakiten. Akapndu kin nggit Aku ngaloken persembahenndu e?
14. Kena sumpah kap penipu si mpersembahken rubia-rubia si lit cacatna man bangKu, sedangken i bas rarasenna lit rubia-rubia si mejile si enggo ipadankenna iberekenna man bangKu! Sabap Aku kap Raja si Mbelin, janah kerina bangsa mbiar man bangKu.”

TEMA : PERSEMBAHEN EME TANDA KEHAMATEN

T U J U N : Gelah Moria:

Meteh persembahen si ngena ate Tuhan.
Nehken persembahen si mehuli arah pusuh si mehamat man Tuhan.

METODE PA : Sharing Pengalamen

Kata Penaruh.
Maleaki ertina "persuruhenKu." Nabi enda erdahin kenca bangsa Israel mulih i pembuangen Babil nari kira-kira tahun 470 sope Kristus. Isi kitab enda mbue ncidahken maka kurang mediatena ras kurang ngehamati Dibata bangsa enda terlebih imam-imam. Sie teridah arah persembahenna man Dibata si mekarus, kebaktin-kebaktinna la arah pusuh ras lanai ngergaken perjabun. Icidahken i bas kitab enda maka Dibata labo sinik nandangi perbahanen bangsaNa. Ipindoken nabi pe gelah tuhu-tuhu bangsa enda banci jera i bas lagu Iangkah si la ngena ate Dibata. Si man oraten i bas PA-nta sendah eme bagin pemena i bas kitab enda, si encidahken perbahanen si mekarus nandangi Dibata tupung bangsa enda ngendesken persembahenna.

Mpebagesi Pengangkan Kerna Ogen.
Ayat 6, tangkas icidahken uga perbahanen bangsa Israel tupung ngendesken persembahenna. Ibandingkenna pe uga kehamaten sekalak anak nandangi bapana, entah bagi suruh-suruhen nandangi tuanna. I bas budaya Israel ras budaya Timur umumna mehamat kal anak man orang tuana. Biasana sekalak anak ngehamati bapana (orang tuana) alu mereken pangan si mehuli man bana. Entah sekalak suruh-suruhen labo pang mekarus nandangi tuanna. Tapi bangsa Israel Ia encidahken kehamaten si bage rupa nandangi Dibata. Amin bage pe perbahanenna tempa-tempa la isadari bangsa enda, emaka nungkun ka is tempa "i bas kai Kam igombangi kami?" Emaka ituriken Dibata arah nabi enda uga perbahanen bangsa Israel eme:

Mpersembahken pangan si keliamen (Ind: roti cemar). La tangkas si eteh uga roti si enggo cemar. Banci jadi roti e enggo dawanen. Lanai terpan.
Maba rubia si pentang jadi persembahen, asuh-asuhen si pinakiten tah cempang. I bas Kitab Ulangen ras Imamat enggo isingetken i je maka la banci ngendesken man TUHAN rubia-rubia si ercinengga (Ul. 15:21, 17:1, Im.22:18). Ibandingken Dibata perbahanen bangsana si bage kune ibaba ku Gubernur. Adi jelma pe la atena ngena, apai nari Dibata si mada kerinana?
Ngendesken persembahen si man bana pe ciga atena (ay. 12).
Ngendesken asuh-asuhen bekas tinangko, cempang ras pinakiten (ay.13)

Emaka ituriken Maleaki, kuga perbahanen Dibata nandangi bangsa si mekarus ngendesken persembahenna:

Dibata la nggit megiken pertoton bangsa enda (ay. 9). Jadi, lit hubungen persembahen ras uga Dibata megiken pertoton bangsaNa. Adi mekarus i bas mereken persembahen maka Dibata pe la nggit megiken pertotonna.
La meriah ukur Dibata dingen la IA nggit ngaloken persembahen si bage rupa (ay. 10)
Kena sumpah penipu si mpersembahken rubia-rubia si lit cacatna man Dibata. Enda kalak si enggo erpadan ngendesken persembahen si mejile man Dibata tapi la idalankenna amin pe it nge i bas ia.
Arah kitab Hagai si idah merawa TUHAN man bangsa sabap ipeturutna Rumah Pertoton runtuh janah ia sibuk mpesikap rumahna sekalak-sekalak.

Bagenda me Dibata mpersingeti bangsana, la ateNa bangsa enda jadi bangsa si la bujur, adi lit si la payo, ipersingetiNa gelah jera.

Pengkenaina.
Arah Kata Dibata si man oratenta enda si idah maka kepeken iidah Dibata alu tangkas kerina persembahenta. Uga kita ersembah man baNa. Dibata merawa adi kita mekarus ersembah man baNa, umpamana si bereken si cacat, bekas tinangko, roti si enggo dawanen ras sidebanna. Erkiteken mekarus pertotonta la ibegiken Tuhan. Enda jadi pelajaren man banta sekalak-sekalak. I jenda situhuna labo soal belin kitikna tapi ula mekarus ersembah man Tuhan janah ula erbual man baNa. Ula mekarus e banci si cidahken alu: adi mere persembahen enggo min si sikapken rumah nari. Umpamana wari minggu, si mehulina Sabtu enggo si sikapken ras kerina isi jabunta. Ulanai kita nukari kolekte muat ku Gereja e. Janah duit si persembahenken kita e, pilihi Si mejilena. Ula si erlinuk-linuk, ula ka si linuk tempa mela kita idah kalak. Jenari beliganna rikutken kengasupen ras buena pasu-pasu si ibere Dibata. Adi lit iklan "apapun makanannya minumnya..." Kimaun lit perbagidina i bas Gereja. Uga pe bayakna seri kerina persembahenna. Hobbi kal kita seragam ningen e. Emaka kolektenta pe seragam dua ribu kerina. Enda buktina lenga si gejap keleng ate Tuhan man banta. Adi galang tuna galang lah ban nurungna, adi kitik launa kitik ban nurungna. Ertina maka si iendesken erpalasken pasu-pasu Dibata banta. Ula mekarus. Merawa kepe Dibata kune mekarus kita mereken persembahen man baNa. Si saksiken kinitekenta, buahna arah maba persembahen si mehulina man Tuhan. La isuruh Dibata kita erpadan (nazar) tapi adi enggo erpadan merawa IA adi la idalanken.

Sharing Pengalamen.
Pernah nge kita ku Gereja kalak, entah si idah umat agama si deban ersembah, jenari si idah mehamat dingen mehuli ibanna persembahenna? Cuba erbagi pengalamen kita. Jenari ban komitmenta uga caranta mereken persembahen kari ku wari si reh enda tanda kita mehamat man Dibata.

Pdt. Yunus Bangun M.Th