Perukuren Simbaru - Evaluasi Entrepreneurship ( Bahan PJJ 8 - 14 Maret )


Bahan Bimbingen Perpulungen Jabu-Jabu 8 - 14 Maret 2020
Perukuren Simbaru
Evaluasi Entrepreneurship

Ogen : 2 Korinti 5:16-19
16. Dage genduari pengerganta nandangi sekalak manusia lanai bo rikutken pertimbangen manusia. Aminna gia nai pengerganta nandangi Kristus e rikutken pertimbangen manusia, tapi genduari lanai bage sibahan.
17. Adi kalak ersada ras Kristus, ia me tinepa si mbaru, si male enggo lepas janah nehenlah, si mbaru enggo reh.
18. Kerina si enda Dibata erbahanca, maka arah Kristus, kita si gelgel nari ermusuhen ras IA, enggo ibahanNa jadi temanNa. Janah man kami iberekenNa dahin guna njadiken musuhNa jadi temanNa.
19. Alu kata si deban: Dibata enggo nai reh i bas Kristus; enggo ijadikenNa manusia jadi teman Dibata. Dibata la mperkiraken kelepaken manusia. Janah man kami enggo iendeskenNa Berita perdamen e.
Geluh manusia terus menerus ipelimbarui, erbage si baci erbahanca ia reh tambahna i bas kerina simehuli nandangi geluhna. Kegeluhen idoni enda "dinamis", la bage-bage saja, reh erbagena ras reh tambahna kecibal si man bentasen tentuna reh buena tambah informasi, pemeteh, pengalamen ras jelma si jumpai kita. Kerina situasi enda mabai bana tambah pemeteh manusia, sendalanen maka tambah ka keperlunna janah tambah maga-magana.

Adi siperdiateken i bas kecibal geluh masyarakatta perpudi enda, mbelin kal perubahan si jadi, berubahna perayaken geluhna mahan bana maka berubah ka 'gaya hidupna'. Manusia enggo lebih ngasup 'menikmati hidup' alu erbage kesempaten ngenanami erbage ulih latihna subuk sebage "produsen" bage pe "konsumen." Arah surat 2 Korinti 5:16-19 enda, Rasul Paulus mpetandaken status kalak si tek man Jesus gelah ngasup ngergai dirina jine ras nggeluh alu mehuli bagi sinisuraken Dibata. Lit piga-piga hal si ateta siperdiateken jadi pejemba man banta:
  • Ngergai sekalak jelma lanai erpalasken sukat-sukat perukuren bage pe pertimbangen manusia eme kepentaren doni ras jamanna. Geluh si mbaru sukat-sukatna ersada ras Kristus. Ertina, i bas perkembangen ntah pe perubahen jaman, manusia nggeluh i bas erbage situasi ras kecibalna tapi tetap ersada ras Kristus. Persadan enda sinjamin dingen njadiken maka la ia papak ntah pe bene. 
  • Kita enggo iperdameken, enggo jadi teman dingen sikerajangen Kristus, alu bage geluhta enggo ngusih Kristus guna mperdameken kerinana. Dahinta njadiken kerina si gelgel imbang jadi teman sabab sie me si jadi sura-sura Dibata reh ku doni enda i bas Jesus. Biak si bage me teridah i bas kalak si enggo itebus dingen ersada ras Kristus, igelari tinepa simbaru.
Emaka perlu kal kita njaga statusta selaku tinepa simbaru. Njadiken doni sigelgel musuh jadi teman, nerangi sigelap, ngembari si lepak. Bage me kehadiren dirinta i bas tahun-tahun geluhta idoni enda bage pe nehi perayaken gerejanta. Perlu si siksiki gelah sieteh kuga perkembangen dirinta i bas simehuli. Biak kai nge sitambah i bas dirinta sebage sekalak entrepreneur? Tentuna arus lit siidah dingen sieteh perkembangenta i bas tahun silepas ku tahun enda dingen kuga perubahenta kenca kita mentasi tahun entrepreneurship. Tambah nge "kreativitasta" subuk i bas dahin-dahin, kegiaten perpulungen ntah i tengah-tengah masyarakat? Enggo nge berinovasi kita i bas erbage dampar si lakoken kita; enggo nge pang ras pang nge kita muat resiko i bas teptep keputusenta silakoken kita? Kerina enda banci ilakoken adi perukurenta enggo ipelimbarui, caranta ngidah ras mutusken erbage hal enggo ipelimbarui (icerahken) kepentaren si reh i bas Dibata siringan ras ersada i bas dirinta.

 Si enda kerina ilakoken i bas kegeluhen si ersada ras Jesus Kristus. Biak-biak si nai, mekeng, la terajari, la nggit berubah, la mbuka diri i bas erbage pembarun si lit, enda labo biak si nggit erlajar. Amin bas sie kerina kita arus metenget gelah la iterjebak ras tersesati i bas entrepreneurship si la sue ras etika Kristen, adi sie jadi, tentuna perukuren simbaru la i bas Kristus. Arus lebe siuji kerina simbaru subuk i bas entrepreneurship, teknologi informasi, pemeteh si debanna erpalasken persadanta ras Kristus. Gelah kerina simbaru ndai erbahan geluhta reh ulina, jadi pasu-pasu nandangi dirinta ras doni enda, kedungenna termulia gelar Dibatata.

EVALUASI
Lit nge usulta i bas PJJ ta nari ku Musyawarah Warga Sidi Runggunta?

DISKUSI : 
  1. Selaku kalak si enggo ipelimbarui, i bas kai-kai saja enggo teridah perubahen dirindu? Turikenlah!
  2. Turiken perkembangen siidahndu i bas dirindu secara pribadi bage pe i bas perpulungen kenca kita mentasi tahun entrepreneurship?
AKSI :
Ngisi lembaren kerja :
Si tanda; dirinta ras perkembangen, perubahen si jadi sebage evaluasi tahun entrepreneurship i bas tahun si lepas (before dan after) arah biak-biak si lit i bas kita.



Sibahan nilai antara 0-100 arah enda si idah grafik pertumbuhkembangenta selaku kalak sitetap nggit erlajar dingen ipelimbarui.

USULEN LAGU : 
  1. KEE GBKP No. 424:1-2 
  2. KEE GBKP No. 323:1-2 
  3. KEE GBKP No. 451:1-
  4. KEE GBKP No. 184:1-3  

TOPIK PERTOTON SYAFAAT :
  1. Ngawan perpulungen GBKP tetap geluhna ipelimbarui i bas persadanna ras Jesus Kristus.
  2. Ngawan GBKP muat bagin i bas kerina perkembangen kegeluhen dingen ngasup jadi pasu-pasu.
  3. Kerina perpulungen nggit niksiki dirina alu ngevaluasi dingen nggit nambahi pemeteh.

 Pdt. Suenita br Sinulingga, M.Th.



Belum ada Komentar untuk "Perukuren Simbaru - Evaluasi Entrepreneurship ( Bahan PJJ 8 - 14 Maret )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel