TI / Manfaatnya dan Tujuannya - Erlajar Gelah Pentar ( Bahan PA Mamre 15 - 21 Maret )


Bahan Bimbingen PA Mamre 15 - 21 Maret 2020
TI / Manfaatnya dan Tujuannya

Ogen : Kuan-kuanen 1:1- 7
Tujun pengajaren enda
1. Enda me pengajaren Salomo, anak Daud raja Israel.
2. Tujunna e me nampati kalak gelah pentar dingen ngaloken pengajaren si mehuli, janah ngantusi ranan si mbages ertina.
3. Iajarkenna kalak maka nggeluh pentar, bujur, adil dingen benar.
4. Iajarkenna kalak si langa erpengalamen gelah cerdik, kalak si nguda gelah pantas dingen pentar.
5. Pengajaren enda banci nambahi pemeteh kalak pentar, janah kalak si enggo meganjang sekolahna pe banci erlajar i jenari.
6. Alu bage banci mbages isipatina erti si terbuni i bas pengajaren enda janah ietehna njabap persoalen-persoalen si ibereken kalak pentar.
Ajar man anak perana
7. Guna ndatken pemeteh, si pemenana si la banci la lit i bas kalak e me mehamat dingen erkemalangen man TUHAN. Kalak lenge la nggit mperdiateken kepentaren dingen la ia nggit erlajar.
Tema : Erlajar Gelah Pentar

Tujun : Gelah Mamre:
  1. Meteh maka erkemalangen man Dibata mpengasup kita nggeluh pentar, bujur, adil ras benar
  2. Meteh pentingna erlajar kerna pengelolaan informasi ras Teknologi Informasi ras makekenca guna kemulian Dibata 
Metode : Diskusi

KATA PENARUH
Segedang geluhta lalap ngenda kita erlajar. La erngadi-ngadi nggit erlajar nambahi pemeteh tujunna membekali / memperlengkapi kegeluhen jelma seh erkesunduten segelah pentar (berhikmat dan bijaksana) dingen berhasil segedang kegeluhenna i doni enda. Galumbang pencapaian bas lompaten pemeteh dingen teknologi terus terjadi alu la lit batasenna, subuk bas hal sederhana ku hal si rumit dingen kompleks. Enda pe nalangi terobosen ku kerina bidang, termasuk si mbaru subuk agama, seni, sosial, ekonomi, politik, teknologi, lingkungen seh interaksi antar manusia. Dampak na erbahanca kegeluhen jadi reh bayakna bas erbage variasi dingen kemungkinen si mabai dame dingen keriahen.

Metode pengajaren anak kalak Israel i biasaken nulis, menghafal, seterusna isampati ngoge, nyalin dingen menghafal naskah-naskah penting, rikut pedah kalak pentar, tokoh penguasa ras palas ajaren Pustaka si Badia. Mulai bas umurna si nguda denga kal anak-anak enggo i isi alu pengertin (refleksi) dingen bekal pemeteh ras kepentaren si hebat. Janah pokok si penting eme kerna unsur e khusus peristiwa sejarah Keselamaten Israel i teruh kuasa, penampat dingen pengkawali Dibata si Mada Kuasa.

URAIAN 
Kuan-kuanen eme cataten pengajaren Raja Salomo, si mindo kepentaren man Dibata (i Raja-raja 3:9), rikut ia mpergermetken pengalamen kegeluhen manusia. Alu nehken pengajaren nuate Raja Salomo eme gelah jadi ulu pengajaren si nampati kalak nggeluh pentar bas pemeteh, bujur, adil dingen benar bas ndalani kegeluhenna(3). Arah kepentaren dingen pengertin si iajarken e, tole nambahi kengasupen si ngogesa ngerti dingen nampati ia guna rukur secara mandiri ku kiniulin geluhna, ngasup menilai situasi (momentum), dingen ngasup muat keputusen-keputusen si mbelin bas ndalani geluh alu ulih keberhasilen, keuntungen, kebenaren dingen kiniulin. I jenda pe tangkas kal sura-sura Raja Salomo gelah anak singuda denga pedas sadar kerna kai kin si jadi tujun kegeluhen dingen perayaken nggeluh, alu bage la ia nyia-nyiaken geluhna alu lagu langkah si ncedai dirina, jabuna seh ku si nursurna pagin pe. Alu lampas ndatken kepentaren e ngasup pe ia nanggapi/muat solusi bas erbage tantangen simbaru, pergumulen si torah si reh belinna bagi terjangen galumbang (disruption) nandangi kegeluhen sue tantangen ras kecibal geluhna, termasuk perkembangen ilmu pengetahuan/teknologi bas jamannya.

Arah mbue pemeteh maka sekalak si pentar bagi `page dem isina', reh pentarna, reh bernasna reh meteruk ukurna. Janah alu bage ituduhkena janari rehna kepentarenna e, e me arah mehamat dingen erkemalangen nandangi Tuhan (7). Arah mpeteruk bana iadepen Dibata, dat kepentaren si maler ku kerina dampar kegeluhen. Pentar bas kiningudan, pendahin/pencarin/usaha, kegeluhen jabu, jujur, mejingkat, setia. Mehamat dingen erkemalangen man Tuhan, mpeturah bas pertendinta kengasupen guna ncikep alu paguh dingen patuh ajaren kerna kebenaren, perdamen ras kebadian ku bas pendalanken kegeluhen si tep-tep wari. Alu palas pengertin si bagenda rupa maka kerina kemajun banci ipakeken mamre guna kiniulin kegeluhen, bagepe guna kemulianTuhan. La ia bagi kalak lenge si hobi erjengil, erpekat bas sijahat, perkisat, rangap. Sinuratken Kuan-kuanen ngidah maka kerina lagu-langkah si lenge ndarami dalanna ku kebenen dingen kematen.

Aplikasi
Bas masa si reh enda tentu pengembangan ras inovasi teknologi erbahanca media informasi-teknologi transformasi digital ngasup nambahi kecepaten pengunduhen, pengunggahen data lebih melala dingen lebih cepat, jangkauan luas dingen koneksi lebih stabil. Janah mbue hal si labo terbayangken kita genduari banci alu mehuli itangani teknologi, janah bas si e peran manusia banci ndauh urak, misalna : ndarami ras nyelamatken korban kecelakaan kapal, pesawat, memantau kebakaren hutan, control lalulintas ras kendaraan tanpa supir, alat pemantau kesehaten, pengirimen barang alu pesawat la erpilot (drone). Bage pe tentu saja dominan bas produktivitas pabrik usaha ras peningkaten kualitas.

Perubahen ras tantangen informasi teknologi enda kerina ulih pendahin kalak si erpemeteh ibabo doni enda. Janah ibas si e arus kita ngasup nipatisa, alu ndatken kengasupen makeken/memanfaatken alu mehuli dingen payo ku bas kiniulin, keuntungen kegeluhen rikut pe kiniteken (pelayanan). Hal enda misalna alu modal terbatas ise pe ia, anak singuda denga seh orang tua e nggo banci minaga alu media on line shop, trading saham, menjalin komunikasi keluarga/teman si ndauh. Ula jadi masalah erbahanca kita jadi anti-sosial (kurang komunikasi dingen interaksi bas dunia nyata, erkiteken dekahen selancar, main game lanai nginget waktu i dunia maya), entah ipake guna penyebaren berita bual (hoax) dingen alat kejahaten.

Alu muat waktu itengah kesibukan alu erbagi ayat-ayat/video erpalasken ajaren Alkitabiah, singkat dingen padat banci jadi bahan saat teduh keluarga. ikut pe si sebarkenka arah media sosial, alu pertoton maka e jadi pengajaren si erguna rna singogesa. Janah e pe sada metode pendekaten manusia si labo tersekat dindng suku, agama, kelompok kepentingen. Adi mehuli ipersiapken maka media e banci mbere pengertin sibenar dingen mengubah perukuren seh pe ku kiniteken jelma
singalokenca.

DISKUSI : 
  1. Kepentaren si uga nge si jadi tujun penulis kitab Kuan-kuanen nandangi kalak simesikel ndatken pemeteh? 
  2. Kai perlu siban gelah kita pentar makeken kerna kemajun Informasi Teknologi gundari enda ku peningkaten kesejahteraan, bage pe erkiniteken man Dibata?
USULEN ENDE-ENDEN:
  1. KEE GBKP No. 264 : 1 - 3.  ( KLIK JUDUL KEE UNTUK MELIHAT LIRIK )
  2. KEE GBKP No. 209 : 1, 2, 5.   ( KLIK JUDUL KEE UNTUK MELIHAT LIRIK )
  3. KEE GBKP No. 255 : 1, 4.   ( KLIK JUDUL KEE UNTUK MELIHAT LIRIK )
  4. KEE GBKP No. 286 : 1, 3.   ( KLIK JUDUL KEE UNTUK MELIHAT LIRIK )
Kepustakaan
Pustaka si Badia, LAI. Jakarta. 2006.
CNBCindonesia.com, ApaituTeknologi 5G, Sumbersengketa Trump vs Huawei? RehiaSebayang, 12.02.2019 21.18)
Wim van der Weiden. Senihidup. SastraKebijaksanaanPerjanjian Lama. Kanisius. Jogjakarta. 1995.


Pdt. Imanuel K. Ginting, S.Th
HP. 081362180453

Belum ada Komentar untuk "TI / Manfaatnya dan Tujuannya - Erlajar Gelah Pentar ( Bahan PA Mamre 15 - 21 Maret )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel